مقال تحليلى : القدرة على الانتقال الجزء 1

السلام عليكم ورحمة الله وبركاته

النهاردة هنحلل مع بعض القدرة على الانتقال من مكان للتانى فى الكوميكس

وهقسم المقال على كذا جزء والجزء الاول بعنوان (سر وانواع التنقل)

طبعا القدرة دى بيتمتع بيها الكثير من الشخصيات فى الكوميكس منهم Nightcrawler و Blink فى مارفل

و Chronos و Darkseid من دى سى

بس ازاى بيقدروا يتنقلوا من مكان للتانى او بين الابعاد

دى حاجة يا سيدى الفاضل موجودة فى الفيزياء عبارة عن تكسير الجزيئات بتاعت المادة مع امكانية اعادة بناءها بنفس الشكل فى مكان تانى

ازاى بردو مش فاهم

ابسطهالك ناخد نايت كرولر كمثال

نايت كرولر عنده الميوتاجين اللى هو موجود عند المتحولين كلهم ومتوارث من الـ Celestials

بس ميقدرش يتنقل الا فى حدود نظره لأنه بطريقة او بأخرى بيقدر يتحكم فى جزيئات جسمه بعقله علشان يروح للمكان اللى شايفه قدامه وعايز يروحله بسرعة

بس ظهرت بعض المواقف كان بيقدر يتنقل لأماكن بمجرد تخيلها او تذكرها

طب هو بيتذكر المكان بس؟

لا ده بيتذكر المكان بالطريق الموصل ليه من مكانه

يعنى انا موجود فى البيت مثلا وبتخيل الطريق الموصل لمكان كافيه مثلا او مكان ملتقى وانا حافظ الطريق اتخيل الطريق ده علشان اقدر اتحكم بجزيئاتى انها تمشى فيه بسرعة الضوء وتروح للمكان

وده السبب اللى بيخلينا نشوف ما يشبه الدخان بعد انتقال نايت كرولر دى بتبقى خلايا ميتة بتخرج من جسمه لأنه مبيقدرش يتحكم فيها وده ادق تفسير قدرت أوصله

-طب معنى كلامك ده ان نايت كرولر مش Teleport ده Telekinesis

لالالالا .. لا يا بابا

التيليكنيسيس غير التيليبورت

التيليكنيسيس انه يقدر يحرك اى شيئ بعقله انما التيليبورتر بيقدر يحرك جسمه بس كجزيئات بعقله فى فرق بينهم

 دلوقتى عرفنا مفهوم التنقل انه تكسير لجزيئات المادة مع امكانية اعادة بناءها فى مكان تانى

وعرفنا شرط التنقل هو المعرفة الشديدة بالطريق المؤدى لمكان التنقل

انواع التنقل بقى كتيرة بس انا هتكلم عن اشهرهم

(ملحوظة) : الاسماء دى مش موجودة وهى تقسيم شخصى لأختلاف طرق التنقل يعنى التنقل مهما كانت طريقته فـ هو واحد بس انا بصنف الطرق

1-وهو اشهر نوع والمستخدم مع معظم الشخصيات

التحكم فى الجزيئات بالعقل او الـ Mental Teleportation

وده اللى موجود مع نايت كرولر بأنه بيتذكر الطريق المؤدى لمكان (مبتنجحش كتير) ويروحله فوريا

ويعتبر هو اساس تواجد حاجة اسمها تنقل اصلا

وكمثال على كدة شخصية Psylocke

2-الـ Portal Teleportation
وده القدرة على خلق بوابات من مكان للتانى وغالبا بيبقى النوع مسيطر على التنقل بين الابعاد او العوالم

والبوابة بتبقى غير مرئية على عكس النوع الجاى وبتنقل صانعها من مكان للمكان اللى هو عايزه بمجرد التفكير فيه والنوع ده مش بيتطلب انه يفتكر طريق مؤدى للمكان لأن البوابة بتقوم بالدور ده

3-الـ W-H Teleportation

او الـ Worm-Hole Teleportation

ده بردو مش بيطلب من صاحبه ان يبقى حافظ طريق لجزيئاته تمشى فيه هو بيعمل بوابة بتكون مرئية او غير مرئية على راحته يعنى وهى اللى بتقوم بالدور بردو بس مينفعش يتنقل بين العوالم

لكن بالرغم من كدة بعض المستخدمين ليها اتنقلوا بين العوالم زى Darksied

واللى عندهم القدرة دى ومبيعرفوش يتنقلوا بين الابعاد او بيعرفوا بس لسة مثلا مكتشفوش القدرة دى زى Blink

4-واخيرا وليس اخرا الـ Magical Teleportation

ده بقى مجرد Dimension بيروحوا السحرة فى الكوميكس بس مش بيقعدوا فيه كتير البعد ده بقى الوقت فيه بيمر ابطء من الوقت العادى بكتير علشان كدة يقدر الساحر ياخد وقته فى البعد ده علشان يحدد وجهته وهيكون بالنسبة للاشخاص فى العالم الحقيقى مجرد غمضة عين بس

امثلة على المستخدمين Doctor Strange و Doctor Fate

الانواع دى مأخوذة ومشروحة من افلام الخيال العلمى والمسلسلات والعروض الرسومية اللى هى مبنية على شخصيات فى كوميكس مارفل و دى سى

ده نهاية مقالنا .. اشوفكم على خير

I'LL GO IN PEACE